Digicel a habri tienda nobo na San Nicolas Durante programa Riba Bou na ATV

 

Den un ambiente dushi di Carnaval durante e programa “Riba Bou” presenta pa Ruben Garcia na ATV, Digicel a tene su ceremonia di apertura pa su tienda completamente nobo na e edificio di Bushalte na San Nicolas. Desde su lansamento oficial na Aruba, Digicel semper tabatin un punto di benta na San Nicolas. Durante transcurso di añanan, e cantidad di clientenan den e area aki di nos isla a bay ta aumentando di tal forma cu awor mester por brinda mas servicio y producto na e clientenan aki. Ta aki a tuma e decision pa en bes di un punto di benta, pa por tin un tienda di Digicel mes cu ta brinda tur servicio mescos cu e otro tiendanan situa na Marisol Building, den Caya Betico Croes y riba L.G. Smith Boulevard. Digicel ta mira e importancia pa nan ta mas cerca y brinda un servicio mas personal na su clientenan. Ta den e cuadro aki a habri un tienda algun siman pasa na Tanki Leendert y awor un nobo na San Nicolas. E tienda ta habri for di Dialuna te cu Diasabra desde 9or di mainta te cu 5or di atardi. Clientenan por yega na cualkier un di nan tiendanan pa cumpra un celular nobo, busca informacion riba nan cuenta of hasta paga nan cuenta di celular. Cu apertura di mas tienda di Digicel situa strategicamente rond di nos isla, e compania di celular cu mas ta creciendo na Aruba, den Caribe y hasta den Ocean Pacifico ta percura pa duna su clientenan mas servicio y mas beneficio dor di ta forma parti di e famia grandi di Digicel. E compania, cu e aña aki ta celebra 8 aña na Aruba ta conoci pa ta un patrocinado principal di Special Olympics den tur mercado unda nan ta operando. Ta p’esey mes e atletanan di Special Olympics Aruba tabata presente pa forma parti di e celebracion aki. Ya nan ta den nan pleno preparacion pa e gran olimpiada na Grecia. Riba e fotonan adhunto por mira caranan contento durante apertura di e Digicel Store na San Nicolas.