May 26th 2011 - Digicel ta habri su di seis tienda na Aruba E unico cu un Drive Thru pa cumpra carchi di celular y paga cuenta

Digicel ta habri su di seis tienda na Aruba
E unico cu un Drive Thru pa cumpra carchi di celular y paga cuenta

ORANJESTAD, Aruba – 26 di mei 2011: Digicel a celebra apertura di su di seis tienda na Aruba, den centro di nos isla, esta na Santa Cruz. Den un ambiente festivo y anima a celebra hunto cu nan bisiñanan nobo y otro invitadonan, despues cu a corta sinta pa asina habri e tienda oficialmente. Philip van Dalsen, CEO regional di Digicel Dutch Caribbean, Suriname & Guyana a efectua e ceremonia oficial di cortamento di cinta hunto cu miembronan di Special Olympics, un di e organisacionnan cu e compania di celular ta sostene for di prome cu nan a lansa nan operacionnan na Aruba.

E tienda aki ta e unico na Aruba cu tin un Drive Thru y esaki ta reserva pa servicionan di pagamento di cuenta y cumpramento di carchi di credito pa celularnan pre-paga. Asina aki Digicel  ta demostra un biaha mas cu e compania semper ta buscando pa ofrece opcionnan di servicio facil y lihe cu ta cumbini  su clientenan. Pa tur otro servicio, clientenan y futuro clientenan ta wordo invita pa drenta den e tienda y disfruta di e servicio personal, amabel y di calidad halto cu Digicel ta bon conoci pe.

Digicel Santa Cruz, ubica den e mes edificio cu Subway y Sensei, ta habri di dialuna pa diasabra for di 9or di mainta pa 5or y mei di atardi y e servicionan obtenibel aki ta varia entre pago di bo cuenta mensual, cumpra carchi di celular, cumpra modelo nobo di celular, aplica pa servicionan of productonan cu Digicel ta ofrece.

E acogida di Digicel di parti di e habitantenan di Sta. Cruz y e barionan rond di e districto grandi aki ta hopi bon y e compania di celular, considera di tin e red mas grandi y miho, a dicidi cu a bira tempo pa trece e servicionan den un tienda cu atencion personal pa e clientenan aki.

Digicel tin seis tienda na Aruba, situa combinientemente pa facilidad di tur nan clientenan, na Marisol Building na Oranjestad, Caya Betico Croes, den e edificio di Wendy’s riba L.G. Smith Boulevard, na Tanki Leendert, na San Nicolas y awor tambe na Santa Cruz.

FIN