September 7th 2011 - Digicel ta nombra Remko van der Veldt Gerente General pa Aruba

Digicel ta nombra Remko van der Veldt Gerente General pa Aruba

ORANJESTAD, Aruba, 7 di september 2011: Despues di a forma un carera impresionante durante e ultimo 9 añanan den Digicel, Bert Schreuders a dicidi cu e lo bandona e compania pa por explora oportunidadnan nobo. Bert Schreuders a drenta e famia di Digicel 9 aña pasa tempo cu a cuminsa cu e operacion na Aruba, pero a sigui despues pa Corsou, Boneiro y hasta Guadeloupe. El a ocupa diferente funcion, te cu esun di Gerente General di e compania na Aruba.

Na su luga awor a bini Remko van der Veldt, un cara bon conoci den e famia di Digicel. Remko tabata traha na Digicel Aruba caba y tin experiencia tanto na Corsou, como tambe na Boneiro. E ta biniendo awor for di Panama, unda Digicel tin un operacion grandi y masha competitivo.

Remko van der Veldt a cuminsa traha cu Digicel na maart 2006. Desde e tempo ey, el a traha como miembro di maneho, tanto comercial como general, den Caribe Hulandes y na Panama. El a cuminsa su carera cu Digicel na aña 2006 como Gerente di Benta pa Caribe Hulandes (Aruba, Boneiro y Corsou) y na februari 2009, a nombr'e como Gerente General pa Digicel Boneiro.

Desde november 2009, Remko ta activo den e operacionnan di Digicel Panama, unda el a wordo pidi pa apoya y tuma e liderazgo di e proceso pa apertura di un di e cuater oficinanan regional di operacion di Digicel na Panama. Na juli 2010, a nombr'e Hefe di Regionalisacion y tabata responsabel pa e operacionnan den tur cuater region. Na januari 2010 a  apunt'e como Gerente di Benta na Consumidor pa e mercado di Panama.

Cu mas di 12 aña di experiencia den telecomunicacion na Digicel, Vodafone Netherlands y Orange Netherlands, Remko van der Veldt tin experiencia extenso den e industria di celular cu sin duda lo sa di pusha e crecemento di Digicel Aruba mas ainda.

“Mi ta hopi entusiasma y ta sintimi privilegia di ta un miembro di e team di Digicel Aruba atrobe. Cu lansamento di nos red 4G y nos campaña nobo di Top Up and Win, unda cu clientenan por gana te cu Afl. 180.000 simplemente pasobra nan ta Top Up of paga nan cuenta di telefon postpago, nos ta den un posicion pa ta e lider den e mercado cu e miho red, e miho servicio y dunando nos clientenan mas balor pa nan placa. Compaña nos durante nos celebracion diabierna y diasabra, September 9 y 10, y ricibi regalo di Digicel manera T-shirt y copi pa koffie, tanten cu tin den stock, cu compra minimo di Afl. 10 di Top Up, un telefon celular of USB modem 4G den nos tiendanan. Nos team ta dedica na cumpli cu e promesa di ta e red di mas grandi, mas miho y awor esun di mas lihe tambe pa e comunidad di Aruba,” asina Remko van der Veldt a finalisa bisando.

Digicel Aruba a start cu su operacionnan na Aruba desde juli 2003 y a inverti sumanan miyonario den nos economia desde su inicio. E compania na Aruba ta conta den su gran mayoria, cu empleadonan local cu diariamente ta brinda un servicio excepcional na clientenan. Digicel ta orguyoso di a cambia henter e panorama di telecomunicacion na Aruba, cu sin duda a resulta positivo so pa e consumidornan.

FIN