June 22nd 2011 - Pa brinda clientenan di Aruba un mihor servicio DIGICEL TA BIN CU UN RED NOBO DI 4G Cu ta duna mas velocidad y capacidad di data riba celular


Pa brinda clientenan di Aruba  un mihor servicio
DIGICEL TA  BIN CU UN RED NOBO DI 4G
Cu ta duna mas velocidad y capacidad di data riba celular

ORANJESTAD, Aruba – 22 di juni 2011:  Digicel semper a busca pa brinda su clientenan e mihor servicio posibel y manera nos clientenan mes por ripara caba, nos ta actualisando nos red pa un tecnologia di un generacion nobo den comunicacion mobil na Aruba. Digicel ta den e fase final y pronto lo ofrece nan clientenan e tecnologia di 4G, asina Philip van Dalsen, CEO Regional di Digicel Group a anuncia. E proceso di actualisacion y cambionan necesario na e instalacionnan ta causa cu nos clientenan tin biaha ta experencia un nivel di comunicacion diferente cu normal. "Nos ta pidi nos sincero disculpa na nos clientenan, pero nos ta sigura cu nos ta den e fase final y cu pronto nan por disfruta di un tecnologia nobo y mas avansa, Dalsen a bisa.

Digicel a lanza su operacionnan na juli 2003 creando e posibilidad pa haci yamadanan na un tarifa mas abou y ofreciendo un lista di otro servicionan mas pa nos mercado. Apenas algun luna despues di nan lansamento, Digicel a bira e promer den ofrece su clientenan e servicionan di GPRS permitiendo nan subi internet via nan celular, algo nobo pa nos isla.

Durante e añanan cu a sigui, Digicel a sigui progresa y a crece enormemente den cantidad di clientenan na Aruba, tanto den su clientenan prepaid como tambe esunnan postpaid. Cu e crecemento aki den mente, Digicel conoci pa su red mas grandi y miho, a lansa un red nobo di generacion 2G, conoci como EDGE. Cumpliendo cu e demanda halto pa mas y miho servicio aki na Aruba, Digicel a opta pa haci un inversion multi miyonario pa bin cu un red nobo, conoci como e di cuater generacion den tecnologia di comunicacion mobil, yama internacionalmente como e tecnologia "4G".

Tecniconan di Digicel conhuntamente cu expertonan di e compania mundialmente conoci "Erricson", ta instalando e red nobo cu mester traha awor simultaneamente banda di e red actual di e compania cu a revoluciona comunicacion di celular riba nos isla. E trabounan ta avansando y pronto lo pasa e pruebanan rekeri pa despues pasa tur nan miles di clientenan for di un red pa e otro.

Digicel ta convenci cu, manera e trabounan ta avansando, cu den algun siman mas nos lo por lansa nan red 4G den forma oficial. Prome cu esey, lo sigui haci e pruebanan necesario pa sigura cu asina nan lansa e servicio nobo y moderno aki, clientenan lo ta completamente satisfecho cu e servicio. Cu e avansenan tecnologico den mente, Digicel como e operador di comunicacion mobil cu mas crecimiento den Caribe, Sur y Centro America y Ocean Pacifico, ta convenci cu e mercado local di Aruba lo sirbi como un berdadero ehempel di innovacion pa otronan.

FIN