Special Olympics y Digicel a celebra un fin di siman extraordinario cu

September 11th 2012 - Special Olympics y Digicel a celebra un fin di siman extraordinario cu

Special Olympics y Digicel a celebra un fin di siman extraordinario cu "National Games"

ORANJESTAD, Aruba - 10 di september 2012: Sin ningun duda, e "National Games" di Fundacion Special Olympics Aruba tabata un exito rotundo. E fundacion, conoci pa su voluntarionan dedica y atletanan special cu ta atrae atencion y capta curason di tur hende unda cu nan yega, a haci un trabao extraordinario durante e fin di siman cu a pasa. Hopi cansa, pero satisfecho cu tur evento a bay asina bon, e atletanan y organisadonan a clausura e weganan nacional cu e torneo di bolas criollas diadomingo mainta.

E weganan a cuminsa cu un apertura fenomenal na Stadion Guillermo Prospero Trinidad diabierna atardi cu a conta cu presencia di huespednan di honor, manera Minister di Asuntonan Economico, Asuntonan Social y Cultura, Michelle Hooyboer-Winklaar y Gerente General di Digicel Aruba, Remko van der Veldt.

Tabatin hopi participante na tur e competencianan, cual a inclui e disciplinanan di "track and field", manera coremento y tiramento di bala diabierna atardi, badminton riba diasabra mainta, futbol riba diasabra atardi y bolas criollas diadomingo mainta.

Organisadonan di e National Games, bou liderazgo di Tuyo Werleman y Cai Cai Williams a keda hopi contento cu e resultadonan. Un publico grandi a asisti na tur evento. Tur hende tabata hopi anima y ademas di mayornan y famia di e atletanan, e gran famia di Digicel a bin apoya e atletanan kende ta conta cu nan sponsorship desde cu e compania a establece su mes na Aruba nuebe aña pasa. Special Olympics Aruba tambe ademas ta conta cu algun di e empleadonan extraordinario di Digicel cu a bira voluntarionan regular cu e fundacion.

E weganan di futbol a tuma luga riba veld di Britannia y a conta cu un tribuna hopi gezellig, cu animacion y gritonan pa tur 4 team. E teamnan a consisti cada un di 9 hungado, cual a representa Emma School y Caiquetio School. A hunga e weganan riba mita cancha. Hasta a conta cu presencia di miembro di Parlamento, Lorna Janssen-Varlack cu tabata anima e muchanan di Caiquetio School. Despues cu tur team a hunga contra otro, Emma School (team geel) a keda na prome luga, sigui pa Caiquetio School na di dos luga, Emmaschool (team berde) na di tres luga y Emma School (team blauw) na di cuater luga.

Na e weganan di bolas criollas, Digicel a percura pa un tent grandi pa cuminda y bebida. E ganadonan di e wega final na e evento aki a resulta Cas Shabururi na di prome luga, Centro Sonrisa na di dos luga, Centro Man Na Obra 2 na di tres luga, Brillo di Solo na di cuater luga y Centro Man Na Obra 1 na di cinco luga. Representantenan di Tri-Bike Aruba, como un di nan patrocinadonan y Cruz Cora, como un fiel colaborador, a entrega e premionan.
 
E team di voluntario a haci un trabao extraordinario durante henter e fin di siman, percurando pa sirbi cuminda y bebida pa e atletanan y tur hende presente, pa coordina e weganan, asisti e atletanan y hopi mas.

Tabata un fin di siman extraordinario, unda cu Digicel y Fundacion Special Olympics a trece atletanan, famianan, voluntarionan y fans hunto pa weganan di "National Games 2012" berdaderamente extraordinario! Asina Digicel un biaha mas ta mustra su apoyo na nos hendenan ordinario cu pa medio di loke nan ta haci tin efectonan extraordinario den nos comunidad!

Masha pabien na tur participante y na tur e ganadonan!

FIN