June 14th 2011 - Pa nan por representa Aruba dignamente na Grecia EXTRA SOSTEN DI DIGICEL PA SPECIAL OLYMPICS


Pa nan por representa Aruba dignamente na Grecia
EXTRA SOSTEN DI DIGICEL PA SPECIAL OLYMPICS
 
ORANJESTAD, Aruba – 14 di juni 2011: “Esaki ta e organisacion cu ta mas cerca di nos curason y cu nos ta traha mas estrecho cu nan tambe”, asina Elaine Singh di Digicel Aruba a duna di conoce na momento di entrega un check na Fundacion Special Olympics. Net un rato prome cu nan a Sali pa aeropuerto pa por biaha pa Grecia, e red mas grandi y miho a haci un donacion adicional di 10 mil florin pa yuda cubri e gastonan halto pa hiba nos atletanan special den e weganan olimpico na Grecia. Anualmente e fundacion ta ricibi 30 mil florin di donacion for di Digicel Aruba pero e aña aki, teniendo na cuenta e gastonan extra pa participa den e encuentronan internacional, a opta pa yuda cu mas.

No mas cu algun siman pasa Philip van Dalsen, CEO regional di Digicel Dutch Caribbean, Suriname & Guyana a firma renobacion di e contract cu Special Olympics Aruba durante un ceremonia cortico na e tienda nobo di Digicel situa na Santa Cruz. E ehecutivo di e compania di celular cu mas ta creciendo na Aruba, den Caribe, den Centro America y awor hasta den Ocean Pacifico a recorda con 8 aña pasa Digicel a inicia nan relacion cu Special Olympics Aruba precisamente pa nan por a bay atende e weganan olimpico special na Irlanda. For di eynan a nace un bon relacion cu a bin desemboca den e bishita di e atletanan special Irlandes aki na Aruba.

Digicel a comberti su mes den un “partner” cu Special Olympics Aruba y cu un alegria riba nan cara, e atletanan, miembronan di e team, mayornan y ayudantenan hunto a canta “Ala Bin, Ala Ban, Ala Bim Bom Bam, Digicel...Digicel – Ra Ra ara”.

FINAL